Scano di Montiferro - Iscanu - su situ de Iscanu
Avviso sui Cookie - Questo sito non svolge alcuna attività di profilazione. Tuttavia, per rendere disponibili alcune funzionalità ed assicurare ai visitatori una esperienza di navigazione ottimale, questo sito fa uso di cookie. Leggi la nostra informativa sui Cookie prima di proseguire la navigazione. Proseguendo la navigazione su questo sito gli utenti acconsentono al ricorso di cookie e tecnologie simili online da parte nostra.
MENU
Home News Articulos Download Links Contattami

Sa chida santa

Sas traditziones de Pasca 'e Abrile in Sardigna
SOS RITOS DE CHIDA SANTA IN ISCANU

Sos ritos de sa chida santa sunt, in Iscanu, su momentu centrale e prus sentidu de s'annu liturgicu intreu.

S'abberint cun sas celebratziones de sa Dominiga 'e Prammas e sighint cun sas funziones de sa Giogia e Chenabura Santa e cun sa Dominiga de Pasca. Particularmente suggestivas sunt sas sacras rappresentaziones: cussa de Chenabura Santa chi raffigurat sa passione e morte de Gesus Cristu, e cussas de sa Dominiga 'e Pasca in ue si celebrat su ritu de “S’Incontru”, tra Gesus resortu e sa mama Maria.

Tales rappresentaziones tenent origine antigas meda ma hant mantesu intatta tottu sa suggestione issoro fintzas a dies de oe, tantu da esser ancora sas prus sighidas de tottu s'annu.
Protagonistas sunt sas tres cunfradias de sa idda: sa Cunfradia de sas Animas, cussa de su Rosariu e cussa de Santa Rughe (nada puru de S.Nigola da su nomen de su santu intituladu a su lettoriu in ue sa cunfradia tenet sede). Cust'ultima est sa prus antiga ed est cussa preposta a sos ritos de sa Chida Santa. Pro custu motivu su lettoriu de Santu Nigola est, paris a sa Cresia mazore de S.Pedru, su centru de sos avvenimentos de cussas dies.

Sos ritos cominzant sa dominiga primu de Pasca: in tale die benint beneditas sas pramas, preparadas dae primu da sos “filadores” (foto a manca), zente chi cun manu esperta filat e intrizzat sas pramas pro totta sa idda.
A sa fine de sa benedizione, fatta in su lettoriu de S.Nigola, si andat in solenne prozessione fintzas a sa cresia parrocchiale, pro ammentare sa intrada de Gesus a Gerusalemme.

MERCURIS SANTU
Sa mesa de s’arantzu benit preparada da sas priorissas de sas tres cunfradias (Santu Nigola, Su Rosariu e sas Animas) su Mercuris Santu.
Subra una mesa ammuntada de romasinu, fiorettos e proinca, benint postu s'aranzu a manera chi in mesu benzet fromada una rughe. Subra sa mesa si bi ponet puru una rughe e duos candeleris.
A sa fine de sa missa de Pasca s'aranzu beneditu hat a benner divididu a sos cunfrades paris a una candela adornada cun frèsias e fiorettos.

Cal'est su significadu de s'utilizzu de s'aranzu? Probabilmente custu fruttu, cunsideradu in su Rinascimentu simbulu de abbundantzia, cheret ammentare su tripudiu de sa rinaschida de sa vida. S'aranzu, cun su colore chi amentat su sole, est particularmente addattu a rappresentare Gesus, lughe de su mundu, chi in su simbolismu cristianu benit rappresentadu comente sole biu chi faghet nascher sa vida in sa terra.


GIOGIA SANTA
Su sero de giogia benit celebrada sa Missa in Coena Domini, memoriale de s’istituzione de s’Eucaristia. Durante sa missa su predi repitit su fagher de Gesus chi aiat samunadu sos pes a sos discipulos durante sa chena. Sos discipulos sunt impersonados da priores e suttapriores de sas tres cunfradias.



CHENABURA SANTA
Sa paraliturgia de sa Chenabura Santa si faghet in zassos e tempos distintos: “s’Incravamentu” (sa crocifissione) si faghet in su letoriu de Santu Nigola in manera assolutamente privada; “s’Iscravamentu” (sa deposizione) benit rappresentadu in sa cresia mazore in manera pubblica.

“S’Incravamentu” si faghet a gianna serrada in Santu Nigola a primmu mesudie de sa Giogia Santa. Bi lean parte solu su priore e su suttapriore de sa cunfradia de Santa Rughe (o S.Nigola). Issos acumpanzados da sa priorissa e sa suttapriorissa chi poderant una candela allutta, prelevant cun grande devozione s’immagine de Gesus Cristu da su sepulcru in ue est custodida e che la leant in su presbiteriu de su lettoriu, in ue a pes de s’altare est bistada giai isterrida sa rughe subra sa cale s’immagine benit fissada cun craos robustos.
Issos arrimant poi in preghiera a costazos de sa rughe. S’altare est ornadu cun “su nènnere”, trigu fattu nascher a su bugiu, pro simbolizzare sa sepolture de Gesus Cristu.
Su presbiteriu, pro accentuare sa sacralidade de sa cerimonia, est separadu da su restu de su letoriu da una tela manna (“sa Carta”), raffigurante iscenas de sa passione.
A sa fine de sa cerimonia sas giannas de su letoriu benint abertas e su Crocifissu benit espostu a s’adorazione de sos cunfrades e de tottu sos fideles.

Su manzanu
de sa Chenabura Santa si faghent “Sas chircas”, a sas cales partezipant totu sas cunfradias e sos fideles. Su nomen faghet cumprender chi si trattat de sa chirca de sa Vergine pro su fidzu sufferente.
S’immagine de s’Addolorada benit portada in processione, ind una Via Crucis chi attraversat sa idda frimmande in tottu sos letorios e fininde in su letoriu de Santu Nigola, da in ue benit bogadu su Cristu Crucifissu. Da inoghe sa prozessione si avviat a sa cresia parrocchiale in ue sa rughe benit balziada a costazzu de su presbiteriu.

Su sero
Solennissima est sa Chenabura Santa sa paraliturgia de “S’Iscravamentu”. Protagonistas de sa deposizione sunt “Sos Discipulos”, battor personas bestidas de costumenes antigos rappresentantes sos discipulos chi nde aiant caladu a Gesus da sa rughe pro li dare interru.
Sos discipulos cominzant su 'iazzu da su letoriu de Santu Nigola, chi custodit sos abidos antigos: a pustis de una preghiera nada “s’obrigassione”, sos discipulos accumpagnados da sa cunfradia andant a sa cresia parrochiale in ue s'est giai radunada sa populazione. Issos leant postu, paris a sas tres cunfradias, in su presbiteriu e iscultant paris a sa zente sa preiga de su preigadore. Cando cust'ultimu bi lis narat si avvicinant a sa rughe e incominznat a nde calare su Cristu mortu, sighinde iscrupolosamente sas indicatziones de unu cerimoniale antigu chi benit a manu a manu ammentadu da su preigadore. Su corpus de su Signore, pustis de esser bistadu ammustradu a s'’Addolorada e a sa zente, benit corcadu in “sa lettèrna”, una lettiga ornada de frores e candelas.





Sa prozessione chi che leat su Cristu mortu a su lettoriu de S.Nigola si isnodat a iscurigantinu peri sas carrelas istrintas de Iscanu 'ezzu, accumpagnada da su coro de su “Miserere”. A custu sos antigos bi daiant attenzione meda: da sa forza de sa lughe de sas candelas chi ornaint “sa lettèrna” nde 'ogaint sas previsiones pro su laore.





SA DOMINIGA DE PASCA
Pustis de su selenziu de su Sapadu Santu arrivat sa dominiga de Pasca: sa solenne prozessione de “S’Incontru” concluit ind un grime de festa e tripudiu sas intensas cerimonias de sa Chida Santa, rappresentande s’incontru e su saludu tra Gesus risuscitadu e sa Mama.

De G.F. Piras (Bibliografia: tesi de laurea di M. Cappai)

 

  

Su Cuncordu 'e su Miserene canta i canti tradizionali del Venerdì Santo di Scano di Montiferro (OR) recuperati da antiche bobine degli anni 50.


Imprenta
Share
 Autore : MicroPiras
 Publicadu : Chenàbura;, 18 Martzu 2011 - 11:11
 Urtima modìfica : Mèrcuris;, 4 Freàrgiu 2015 - 18:09
 Pàgina lèghida 8301 bortas

New-CMS 2.9.7 Valid CSS Valid html 5 GNU General Public License Admin
This page was created in 0.0987 seconds
Contenuto del div.